Mis Dorf, mini Wäut

I mim Troum stah ni höch ob mim Dorf
S` isch mis Dorf u mis Tau, vo dert chumi här
I gseh wyt, wyt unger das Schrynerhuus
U gseh o, was vor druffe steit: P. Heiniger-Schär

Der P. isch mi Vater, der Heinigerpoul
U wo, dass Gott hocket, das weiss numen är
Der Vater vor Muetter weiss o, wo der Herrgott isch
U das Huus ghört am Herr u am Gott u am Grossvater Schär

U gross u läng u breit ligt vordrann d`Hösumatte
Sie lüchtet grüen u häu, u gottseidank, sie isch no läär
U dert im Park steit schön u stouz die grossi Villa Reichen
U o der mächtig Löie steit no gäng, eso wie denn, s`isch lang, lang här

Du mis Dorf
Im Ämmitau
I weiss no gnau
Wie d`mau bisch gsy
U ig vergisse nie
Was du mir alls hesch gä
U niemer cha mir`s näh

Dert i däm Dorf, dert ha ni gschuttet, turnet, gschlöflet
U ha mit Fründe zäme när mi Jazz u miner Lieder gspilt
U i ha dert miner Helde verehrt, u so mängs vo ne glehrt
U när, irgendmau, hei mir mit der Band, dä uraut Saal im Hirsche gfüllt

Ir Beiz hei mir gsoffe u gsunge u gröhlet, plagiert
Hei üsi chlini Wäut gfyret, u hei nüt vo der grosse gwüsst
Ig o, eso jung, u so bring, u so chlyn, i ha gmeint, `sig der Gröscht
Wo ni znacht mau im Äntelipark so ne starchi u grossi Frou ha küsst

Miner Heude spile Hockey, schutte uf der Züghusmatte
I der Badi hechte sie vom Brätt, u i wär gärn, so eine gsy wie die
Eso ne Wittwergeru, Bärtschistifu, Lüthihardu, Gärberrüedu, Zouggemil, ScarnicciI
luege zue ne ueche, o no hüt, wo scho fasch au höch obe i mim Heudehimmu sy

Du mis Dorf
Im Ämmitau
I weiss no gnau
Wie d`mau bisch gsy
U ig vergisse nie
Was du mir alls hesch gä
U niemer cha mir`s näh

Am Sunntig ueche uf d`Hohwacht u ache när zum Schanzeport
Teu gumpe höch u gumpe wyt, u stürze ab so wie ne Stei
U pfyffegredi uf de Ski när aus zdürab a d`Iufis u a Hockeymätsch
U üser Härz, die gumpe höch u gumpe wiud u töne lut dür ds Tau, we üser gwunne hei

I gseh der Hösubuur ir Hösumatte bschütte, mäie, höie
U i bi wieder jung, u schnäu, u wiud, u aus isch da u nüt isch gsy
U schön u gross stöh o no au die Böim dert obe ar Alleestrass
U au die aute Hüser, ds Fäud, mis Dorf, mi Wäut – sie läbt, nüt isch verby

Du mis Dorf
Im Ämmitau
I weiss no gnau
Wie d`mau bisch gsy
U ig vergisse nie
Was du mir alls hesch gä
U niemer cha mir`s näh

(Langnau-Bilder aus dem Archiv von Serge Schmid – www.sergeschmid.ch)